കളറെടുക്കാത്തവൻ്റെ കൈപ്പിഴ

ബിനു എം പള്ളിപ്പാടിൻ്റെ 'അവർ കുഞ്ഞിനെ തൊടുമ്പോൾ' എന്ന കാവ്യസമാഹാരത്തെ മുൻനിർത്തിയുള്ള പഠനം

Abstract

സമകാലിക ദലിത് കവിതയെ പ്രമേയതലത്തിലും ആഖ്യാനതലത്തിലും  വേറിട്ട വഴിയിലൂടെ നടത്തിയ കവിയാണ് ബിനു എം പള്ളിപ്പാട്. അദ്ദേഹത്തിന്റെ കാവ്യലോകം പങ്കിടുന്ന പ്രത്യേകതകളും അവ തീര്‍ത്തുവയ്ക്കുന്ന സംവേദനത്തെയും സൂക്ഷ്മമായി അടയാളപ്പെടുത്തുന്നതാണ് ഈ ലേഖനം. സാദായിക കാവ്യപദാവലികള്‍ക്കിണങ്ങാത്ത ദലിത് അനുഭവലോകത്തെ വേറിട്ട ഭാഷയിലൂടെ തുറന്നാവിഷ്‌കരിച്ചുകൊണ്ട് വരേണ്യതയെ പ്രതിരോധിക്കുന്ന രാഷ്ട്രീയമാണ് ഈ കവിതകള്‍ മുന്നോട്ടു വെക്കുന്നത്. സാഹിത്യലോകത്തേക്ക് പ്രവേശനം കിട്ടാതെ പോയ പദങ്ങളുടെ നീണ്ടനിര ബിനു എം പള്ളിപ്പാടിൻ്റെ കാവ്യലോകത്ത് പ്രത്യക്ഷപ്പെടുന്നതിൻ്റെ പശ്ചാത്തലമതാണ്.

കറുപ്പിനെ ഓരത്തേക്ക് മാറ്റുന്നതിൻ്റെ ചരിത്രത്തെ കണ്ടെടുക്കുന്ന കവിതയാണ് 'സ്റ്റുഡൻ്റ്  വാട്ടര്‍കളര്‍'. കത്തുന്ന ലോകവും കരിഞ്ഞ മാംസവും വരയ്ക്കാന്‍ കളറെടുക്കാതിരുന്നവരാണ് തൻ്റെ ഗുരുക്കന്മാര്‍ എന്ന് ഈ കവിത സാക്ഷ്യപ്പെടുത്തുന്നു. പൊള്ളുന്ന ദലിതനുഭവങ്ങളെ അടയാളപ്പെടുത്താതെ കളറെടുക്കാതെ പോയ ചരിത്രത്തിലെ അഭാവങ്ങളെ; അദൃശ്യതകളെ കവി ഇവിടെ അപലപിക്കുന്നു. ഇത്തരം സാംസ്‌കാരിക പരിസരത്തിലാണ് കളറെടുക്കാത്തവൻ്റെ കൈപ്പിഴയായി കറുപ്പിനെ കവി ആവിഷ്‌ക്കരിക്കുന്നത്. കവിയുടെ ഈ  പ്രയോഗത്തെയാണ് പ്രബന്ധത്തിൻ്റെ തലക്കെട്ടായി സ്വീകരിച്ചിരിക്കുന്നത്.