താരതമ്യസാഹിത്യപഠനം ചരിത്രവഴികൾ

Tharathamyasahithyapadanam charithravazhikal

Abstract

മനുഷ്യൻ സാമൂഹ്യ ജീവിയായി പരിണമിക്കുന്ന കാലം മുതൽ പാരസ്പര്യത്തിൻ്റെ ചരിത്രവും ആരംഭിക്കുന്നു. സർഗ്ഗാത്മകതയും സാഹിത്യവും അവനിൽ പ്രവർത്തിച്ചു തുടങ്ങിയകാലം മുതൽ വിവിധസാഹിത്യങ്ങൾ തമ്മിലുള്ള ആശയവിനിമയവും പരസ്പരസ്വാധീനവും നിലനിന്നിരുന്നു. അതിനാൽതന്നെ വ്യത്യസ്തഭാഷകൾ, സംസ്കാരങ്ങൾ, ദേശങ്ങൾ എന്നിവയെ അടിസ്ഥാനമാക്കി സാഹിത്യസൃഷ്ടികളെയും പ്രസ്ഥാനങ്ങളെയും തമ്മിൽ താരതമ്യം ചെയ്ത് പഠിക്കുന്ന സാഹിത്യശാഖയായ താരതമ്യസാഹിത്യം (Comparative Literature) സുപ്രധാനമായ ഒരു വിജ്ഞാനശാഖയാണ്. ‘‘സാഹിത്യം ഒന്നേയുള്ളൂ, അത് വിശ്വസാഹിത്യമാണ്, സാഹിത്യം ഒന്നേയുള്ളൂ അത് പലഭാഷകളിൽ എഴുതപ്പെടുന്നു എന്നുമാത്രം’’ എന്നീ രബീനാഥടാഗോർ, ഗൊയ്‌ഥേ തുടങ്ങിയ ജ്ഞാനികളുടെ സാഹിത്യത്തെക്കുറിച്ചുള്ള സങ്കൽപ്പങ്ങളും ‘വസുധൈവകുടുംബകം’ എന്ന ആശയവും താരതമ്യസാഹിത്യത്തിൻ്റെ അടിസ്ഥാന സങ്കല്പമാണെന്നു പറയാം. ഇന്ത്യൻ സ്‌കൂൾ, ഫ്രഞ്ച് സ്‌കൂൾ, ജർമൻ സ്കൂൾ, അമേരിക്കൻ സ്കൂൾ എന്നിങ്ങനെ ചില വ്യത്യസ്തതകളോടെ നിലനിൽക്കുന്ന വിവിധ പഠനമേഖലകളാണ് താരതമ്യസാഹിത്യത്തിലുള്ളത്. താരതമ്യസാഹിത്യ പഠനത്തിൻ്റെ ചരിത്രം പരിശോധിക്കുയാണ് ഈ പ്രബന്ധത്തിൽ.