നവമാധ്യമങ്ങളും കുട്ടികളുടെ അനുഭൂതി നിർമ്മിതിയും - തെരഞ്ഞെടുത്ത നവമാധ്യമ പാഠങ്ങൾ അടിസ്ഥാനമാക്കിയുള്ള പഠനം

Abstract

യൂട്യൂബ്, ഫേസ്ബുക്ക്, വാട്സ്ആപ്പ്, ഷെയർ ചാറ്റ്, ഇൻസ്റ്റഗ്രാം തുടങ്ങിയ അനേകം നവമാധ്യമങ്ങളിലൂടെയാണ് നാമിന്ന് ലോകത്തെ നിരന്തരം വീക്ഷിക്കുന്നത്. മനുഷ്യവംശത്തിന്‍റെ സഞ്ചാരപഥങ്ങളിൽ ഓരോ തലമുറയും ഒന്നിനൊന്ന് മെച്ചപ്പെട്ട സൗകര്യത്തിലും ജീവിതം കൂടുതൽ ലളിതമാക്കുന്ന സാധ്യതകളിലൂടെയുമാണ് മുന്നോട്ടു പോകുന്നത്. വർത്തമാനകാല സമൂഹത്തിൽ നവമാധ്യമങ്ങളുടെ ഉപയോഗവും ഇടപെടലും ആബാലവൃദ്ധം ജനങ്ങളെയും ഒരുപോലെ സ്വാധീനിച്ചിട്ടുണ്ട്. എന്നാൽ പുതിയ തലമുറയിലെ കുട്ടികളുടെ അനുഭൂതികളെ നിർമ്മിക്കുകയും നിർണയിക്കുകയും ചെയ്യുന്ന ഒന്നായി നവമാധ്യമങ്ങൾ പുതിയ കാലത്ത് മാറുന്നതായി കാണാം.  വിവിധ യൂട്യൂബ് ചാനലുകൾ, ഇൻസ്റ്റഗ്രാം വീഡിയോകൾ, മെസ്സേജുകൾ, സ്റ്റാറ്റസുകൾ, ഫോട്ടോ, വീഡിയോ തുടങ്ങിയവയെല്ലാം കുട്ടികളുടെ അനുഭവലോകങ്ങളെ നിർണയിക്കുന്നത് എങ്ങനെയെന്നും അവ അനുഭൂതി നിർമ്മിതിയുടെ ഭാഗമായി മാറുന്നതിന്‍റെ സാംഗത്യം എന്തെന്നും പരിശോധിക്കുകയാണ് ഈ പ്രബന്ധത്തിലൂടെ ചെയ്യുന്നത്.