പ്രതിബദ്ധതയുടെ കഥാകാരൻ

Prathibaddhathayute kathakaaran

Abstract

മലയാളകഥാസാഹിത്യത്തിൻ്റെ നവോത്ഥാനദശയുടെ രണ്ടാമത്തെ ഘട്ടമായ സുവര്‍ണയുഗത്തിലെ  ശ്രദ്ധേയനായ കഥാകൃത്താണ് പൊന്‍കുന്നം വര്‍ക്കി. പ്രസ്തുത കാലഘട്ടത്തിലെ  മറ്റു കഥാകൃത്തുക്കളില്‍ നിന്നും വ്യത്യസ്തമായി, ഏറ്റവും കൂടുതല്‍ സാമൂഹികാംശം നിഴലിക്കുന്ന കഥകള്‍ വര്‍ക്കിയുടേതാണ്. 'തിരുമുല്‍ക്കാഴ്ച' എന്ന ഗദ്യകവിതാസമാഹാരവുമായാണ് വര്‍ക്കി മലയാളസാഹിത്യത്തില്‍ രംഗപ്രവേശം ചെയ്തത്. പിന്നീട്  തനിക്ക് ഉപയുക്തമായ മാധ്യമം ചെറുകഥയാണെന്ന് മനസ്സിലാക്കിയ അദ്ദേഹം കഥാരചനയിലേക്ക് ശ്രദ്ധപതിപ്പിച്ചു.  സാമൂഹ്യപരിഷ്‌ക്കരണം എന്ന ലക്ഷ്യത്തോടെ  സാമ്പത്തികവും മതപരവും ആയ മണ്ഡലങ്ങളിലെ അനീതികള്‍ക്കും അക്രമങ്ങള്‍ക്കും എതിരെ തൻ്റെ രചനകളിലൂടെ അദ്ദേഹം ശബ്ദമുയര്‍ത്തി. തൻ്റെ കഥകളില്‍ സാമൂഹികജീര്‍ണതകള്‍ ചിത്രീകരിക്കുന്നതോടൊപ്പം തന്നെ അദ്ധ്വാനശീലരായ കൃഷിക്കാരുടെ ജീവിതദുരിതങ്ങളും  സത്യസന്ധമായി ആവിഷ്‌കരിക്കാന്‍ അദ്ദേഹം ശ്രമിച്ചു.